ديوان الأميــــر خالد الفـــــيصل

[تسـ тsωαħήــوٍآهـن]

لا هنت






لا هنت يا راس الرجاجيل لا هنت = لا هان راس في ثرى العود مدفون
والله ما احطك بالقبر لكن امنت = باللي جعل دفن المسلمين مسنون
منزلك يا عز الشرف لو تمكنت = فوق النجوم اللي تعلت على الكون
سكنت دار المجد يا شيخ واسكنت = شعبك معك في منزل العز ممنون
صنت العهد يا وافي العهد ما خنت = علمتهم وش لون الأشراف يوفون
كم ظالم عاداك واعفيت واحسنت = واخلفت ظن جموع ناس يظنون
شلت الأمانة حافظ ما تهاونت = شفنا بك رجال على النفس يقوون
يا اللي طلبه الملك بالحب زينت = عرشك بتاج قلوب شعب يحبون
لونت تاج الملك ما قد تلونت = ما غرتك دنياك ما صرت مفتون
بالزهد والمعروف والصبر كونت = منهاج فيصل منهج اللي يعدلون
تلفتت روس المخاليق وين انت = وين العظيم وعود الشوف مطعون
كم خافق وقف عقب ما تكفنت = وكم ناظر ذوب سواده محزون
لو شفت حال الناس عقبك تبينت = مقدار حب الناس للي يودون
مما بقلبي قلت يا بوي لا هنت = والا انت فوق القول مهما يقولون





http://salloomaa.net/up-pic/uploads/fe77683ee1.jpg (http://salloomaa.net/up-pic)

[تسـ тsωαħήــوٍآهـن]

نشوة العز

مرحوم يا شيخ بنى للمجد دولة ودين = وحد قبايلها وعلى بالشرف شانها
عبد العزيز اللي له القاسي يطيع ويلين = تهتز ساحات الوغى لى طب ميدانها
يفخر به التاريخ وتردد نباه السنين = وتشهد له الخيل الأصايل واشهب سنانها
لى ضاع راي الناس رايه بالشدايد يبين = وان ضاعت الهقوات قاد زمام شجعانها
نادر حرار ما يصيد الا سمين وثمين = لى هد ما تفرد صقور الجو جنحانها
من مثل أبو تركي إلى ضاقت يسر الحزين = يبرى عيون من سهرها مل سهرانها
لمعة أمل تلعب على موجة السيف = والشط ممدود مثل صادي السيف
والشمس تجلد بالشعاع الصحاري = والريح تبني بالعجاج العواصيف
فوق البحر موج وفوق الرمل موج = والحلم سيف يلمع بكفه رهيف

[تسـ тsωαħήــوٍآهـن]

وقف .. وظهره للبحر= ولنجد وجهه والنظر
طويل قامة .. طويل ذراع = رفيع هامه .. وصيته ذاع

***

في جبينه نز غضبان العرق = والخطر والعزم في عينه برق
والأمير المغترب عبد العزيز = لاح نوره في سما نجد وشرق

***

وانتهض مثل العقاب اللي شهر = وحولت كل الصقور اللي تحوم
صار يومه عند أطول من شهر = ملك أبوه وجده الغالي يروم

***

يطوي الفيافي والنفود = ينزل ويرقاها سنود
والكايده مهما تكود = عزايم معزي تزود

***

حاولوا يثنون عزمه بالكلام وبالسلاح = وردهم بالقول والأفعال وبروس الرماح
على الركايب وفوق الخيل = غارات جيش وخياله
صباح والا هجاد الليل = ما احد تهنى بمقياله

***

الهجن من فوقها شجعان = أسود ونمور وذيابه
السيف والرمح جاله شان = وردوا على الموت حرابه

***
ستين قرم قادهم عبد العزيز = ستين شهم عالي الجبهه عزيز

[تسـ тsωαħήــوٍآهـن]

ارفع راسك


ارفع راسك إنت سعودي = طيبك جاوز كل حدود ِ
مالك مثيل بالدنيا = غيرك ينقص وأنت تزود
فارس وأجدادك فوارس = واصبحت لعبيت الله حارس
مغروس بالمجد وغارس = في ميدان العز شهود
علمك غانم وجارك سالم = يخشى من هيبتك الظالم
راعي صمله دايم والــم = سيف وقلب وفعل زنود
في العالم ما مثلك مسلم = دايم بالفضيله محرم
والخايف في دارك منعم = عن دخيل حماك تذود
دايم سيفك بيدك سله = ما تغمد سيفك من ذله
وحجاجك دايم منفله = وانت بنصر الله موعود
فعد القايد فهد الرايد = فهد الصقر الحر الصايد
والعيد بفضل الله عايد = وسعودك يا وطن سعودي

[تسـ тsωαħήــوٍآهـن]

غنيت لحنك يا وطن = في عرضة المجد العظيم
كل البيارق غطرفت = عبد العزيز يقودها
أشجاه في الغربة شجن = والحسم بالرأي الحسيم
حر شهر من ماكره = والدار عود سعودها
وثق على صدر الزمن = قصة بها شعبها يهيم
فخار وأمجاد العرب = تزهى جميع بنودها
أهل أربعين نوخن = في تالي الليل البهيم
تسابقوا سور الرياض = الموت فوق عضودها
قوم إلى ثار الدخن = عدوانهم راحوا هشيم
إذا التفت عبد العزيز = بالموت صاح جنودها
بالحرب سيفه ما وهن = حتى يورده الخصيم
هوماته أسرج خيلها = كل يعد عدودها
أمين ميادين الفتن = بالسيف والذكر الحكيم
وبعزمه اللي ما يلين = مكن جميع حدودها
تخير الزهره سكن = والعز يبرى له نديم
ساد الهقاوي كلها = قبل الظنون تسودها
أيام المجد اكتسن = تاريخها معنا يقيم
تغريدة في كل عام = إبن السعود يزودها
يا ماضي الذكر الحسن = ترى الكريم إبن الكريم
أقصد ولد عبد العزيز = فهد يقود فهودها

[تسـ тsωαħήــوٍآهـن]

أنا السعودي

أنا السعودي رايتي رمز الإسلام = وأنا العرب واصل العروبة بلادي
وانا سليل المجد من بدأ الأيام = الناس تشهد لي ويشهد جهادي
دستوري القرآن قانون ونظام = وسنة نبي الله لنا خير هادي
أمشي على الدنيا وانا رافع الهام = وافخر على العالم وانا اجني حصادي
إذا تأخر بعضهم رحت قدام = واذا توارى خايف قمت بادي
إن جيت ساحات الوغى صرت قدام = وإن صرت بلحالي فلانيب عادي
واظهر على غيري إذا صرت بزحام = عقيد قوم بالطبيعة ريادي

[تسـ тsωαħήــوٍآهـن]

اليوم عرضه



صوت يحورب .. قامت تلبي صفوف = طق الطبل .. وانسلت تغطرف سيوف
اليوم عرضة .. نشوة السيف والخيل = والعز ومضه .. في حياة الرجاجيل
صكوا على البيرق قروم النشاما = ذبوا غترهم ما على الهام هاما
كل تحزم بالشجاعة حزاما = يا موت ول .. وبيرق العز قاما
اليوم عرضه .. نشوة السيف والخيل = والعز ومضه .. في حياة الرجاجيل
الأرض ثور عجها حدر الأقدام = رجل تدوس الذل ورجول قدام
العج وأصوات الرجاجيل وزحام = يا موت ول .. وبايع الروح ما سام
اليوم عرضة .. نشوة السيف والخيل = والعز ومضه .. في حياة الرجاجيل
نز العرق بجباه حمر النواظر = كل هتف يا ساعة المجد حاضر
وسيوفهم تمشي كما السيل هادر = يا موت ول .. والطير بالجو كاسر
واليوم عرضة .. رقصة الحرب والموت = وما للرجل رقصه .. سوى رقصة الموت

[تسـ тsωαħήــوٍآهـن]

سلام يا فيصل




سلام يا فيصل عدد ما ذكرناك = واعداد ما قالوا لك الناس مرحوم
واعداد دمع العين في يوم فرقاك = وأعداد ما فرجت من كرب مضيوم
إن قلت يا ليتي ألا ليتي فداك = وإن قلت واعزاه ما نيب مليوم
يا لعن ابو من لام عين تمناك = قد بددت شوفتك عن شوفها غيوم
وين العزا ما به عزا غير نجزاك = بمواصلة مسعاك والدرب معلوم
ترى عزانا يوم حنا فقدناك = إنا خذلنا راي من يزعم زعوم
الراية اللي رفرفت فوق يمناك = أبشرك يا شيخ ما طالها خصوم
إن كان قصد عداك تعطيل ممشاك = حقك علينا ما نوقف ولا يوم
نسير في دربك وناخذ سجاياك = ونرد من هو ضد الإسلام ملطوم
نم هاني العينين حنا تبعناك = والدار فيها لابة مالهم نوم
إن قاله الله ما نضيع لك مناك = نسجد لرب البيت في القدس ونصوم

[تسـ тsωαħήــوٍآهـن]

رفعة الراس





ما اظن يا فيصل يجي لك مثيل = شخص ملك نفسه قبل يملك الناس
قالوا ترى بالناس جنسه قليل = قلت – العفو- ما له مع العالم أجناس
ربي عطاه من المعرفه دليل = من خلقته ضار على رفعة الراس


قالت : أبوك وأغمضت عين الأسى = فعرفت هولا اعجز الأهوالا
ولمحت في غور العيون تساؤلا = هل أنجب الرجل العظيم رجالا ؟
لم أسكب الدمع الحزين وإنما = رمت المثال من العظيم مثالا
لا ينثني عزمي وفيصل والدي = لا عشت إن لم أحتذيه خصالا

[تسـ тsωαħήــوٍآهـن]

اجهد فؤاده



اجهد فؤاده بالعزم والشجاعة = والقلب ما ساير قوي العزايم
هذي سوات اللي طويل ذراعه = يمناه ما تلحق مداها القويم
عز الرفيق وللعدو سم ساعه = من طلعته مع بيرق العز قايم
الحاكم الصالح كثير الوراعه = ما يجنحه عن ما قف الحق لايم
بينه وبين المجد قرب ورضاعه = من عهد ابوه وجد جده قدايم
وبينه وبين الهون بغض وقطاعه = في دارهم والله ماله رسايم
وداع يا شيخ جرحنا وداعه = خالد ولد من صاحبته العظايم

[تسـ тsωαħήــوٍآهـن]

نعم شاعرك



نعم شاعرك وافخر بالسماوه = وسام فيه عز وله حلاوة
وانا ولدك وجندي من جنودك = حدر لازمك في حضر وبداوه
احبك واحترم رايك واطيعك = وفي بالرخا ويوم القساوه
وافاخر بالملك عمي واجاهر = وانبه من على عينه غشاوة
ملكنا غالي والعهد غالي = وغالي الروح للغالي فداوه
فهد زيزومنا في كل ساحه = ظهر له بالوغى ضرس وضراوه
نصادق من رضى عنه ملكنا = ومن عاداه له سم العداوه
اذا عاداه غاوي رد يمه = وقدم له مراسيم الرضاوه
يجي عنده ويشكي سو حاله = على جفوى الملك شاف الشقاوه
مثل مأسور يبكي عند فارس = يبي عفوه وهبات الطراوه
مريض علته غضبة فهدنا = وقالوا يا طيب الوقت داوه
عذرهم شيخنا من كبر شخصه = وكفه بالعطا يقطر نداوه
يقوله شاعر يفدي عمامه = ولا يبغي على الراتب علاوه

[تسـ тsωαħήــوٍآهـن]

يا خادم البيتين


يهناك نصر الله على كل خوان = ياخادم البيتين سيد وطنها
يا من وفا للجار يوم الردي خان = ويا من مروات العروبة حضنها
ويا صاحب الراي المظفر والإحسان = احسنت للجيرة وغيرك طعنها
ويهناك في مقدم هل الحرب فرسان = لله تبيع ارواحها مع بدنها
تسابقوا للمجد والموت شجعان = تباشروا من ريح جنة عدنها
العاصفة ثارت وبالبحر طوفان = ومن السما ترجم خبيث فتنها
من كل صوب جيش ورجال وسنان = عليه لعنة كل حي لعنها
ويهناك شعب ما تخاذل ولا هان = روس المعالي بالمعزة سكنها
أصيل ما يحتاج للطيب برهان = من كل ميزة جامع لك حسنها
والى تباهوا بالمنازل والأوطان = لك ديرة سيد المخاليق منها
والى تباهوا بالرجاجيل والشان = رجالك اللي حذث المجد عنها
وان كان للطغيان بالناس شيطان = فاللي مع الرحمن يكسب رهنها
وان كان من عاداك للدم عطشان = نسقيه من دمه بقايا حزنها
لا خير في ناس تبدل بالألوان = في كل يوم لونها من ثمنها
ولا خير في ناس تستر بالأديان = مع كل دولة دينها من زمنها
أقلامهم زاعت على الزرو بهتان = تصرع روايح حرفها من عفتها
حنا عرفنا وضعنا بين الأخوان = اللي خمع بالقول واللي وزنها
الله ياخذ من له لسان ولسان = خمله يعربها وخمله رطنها
يا خادم البيتين شرفك رحمن = بالبيت والإسلام والله ضمنها
ويهناك نصر الله على كل خوان يا خادم البيتين سيد وطنها

[تسـ тsωαħήــوٍآهـن]

يا فهدنا



المغترب واللي على الدرب رحال = كل يوصينا نرد التحية
لك يا عريب الجد والعم والخال = يا جامع الشارات حامي الونيه
لك يا فهدنا يا سعدنا بالأجيال = لك يا فخرنا بين كل البريه
ياللي لصعبات المشاكيل حلال = تنقاد له غصب وتاتي رضيه
عنده مفاتيح لعسرات الأقفال = تطيع له .. وهي لغيره عصيه
ان قال يفعل وان فعل نعم الافعال = واذا نوى تسهلت كل نيه
حليم لكن لى احترك طاحت جبال = من ضربته يجحد خوي خويه
يا ما توهق من تأنيه جهال = اللي يحسبون النوايا خفيه
إلين زلزل أرض الأخصام زلزال = وكل ثنى عزمه عن دروب غيه
يخاف رب الخلق في كل الأحوال = وعزايمه من طاعة الله قويه

[تسـ тsωαħήــوٍآهـن]

معز الفهود

لى جتني الكلمة من الراس أزود = بالخص لى صار الفهد مصدر القول
تبقى الحروف أيام عمري شهودي = تاج على راسي من العز محمول
ورضاك عني يا عريب الجدود = غاية مناي اللي لها العمر مبذول
افوز بك وانهض وتقوى زنودي = وامشي وانا واثق على الدرب واطول
الله يعزك يا معز الفهود = يا ماجد الأمجاد يا ملقح الشول
إنت السحاب اللي يشيل الرعود = فيه المطر نعمه وفيه الخطر هول
وانت الهبوب اللي هواها ينود = نسيمها ينعش وعاصوفها صول
وانت البحر غوره بعيد الحدود = وسره – ولو قلنا عرفناه – مجهول
وانت الفضا تضيع فيك اللهود = كم كوكب يسري بمسراك مكفول
تسابقت كل المراجل وفود = في مجلسك يا اللي عن العيب معزول
لاهل الكرم عد وعندك عدود = دايم على حاجات الاجواد مشغول
وان ثارت العجه والأيام سود = وقفوا على بابك وما قلت مقبول
فهد ولد عبد العزيز السعود = زعيم شعب كنه السيف مسلول

[تسـ тsωαħήــوٍآهـن]

سحاب العز



الطير غنى والزهر فاح عطره = وامطر سحاب العز في كل ديره
والعارض اللي همنا زال شره = الله يعز الشيخ والله يجيره
إن طاب طبنا وان مرض ضامنا امره = نفداه بالظاهر ومافي السريره
من عمرنا نعطيه ويزيد عمره = ومن فرحنا نجعل لياله سفيره
صقر وفي من ماكر العز شبره = وعينه على عيون غيره بصيره
بين الملوك بحكمته زاد قدره = ولاهل الحوايج في كفوفه بريره
هذي الصروح الشامخه طلع بذره = سحابته بامطار فضله غزيره
العز له ميدان والمجد قصره = ويشهد له التاريخ في كل سيره
فهد صليب الراي زيزوم عصره = لى ثقلت القالات قاد المسيره
الله يديم ايام عزه ونصره = شيخ قليل بالزعامة نظيره

[تسـ тsωαħήــوٍآهـن]

صفوة ملوك العرب

يا صفوة ملوك العرب سلمت خطاك = عداك ربي يا بو فيصل خطرها
الله يجيرك يا فهدنا ويرعاك = يا فرحة بلاد العرب يا مطرها
يا عل صفر ما شهر مثلك فداك = واللي عن الأمجاد رجله قصرها
واللي قصر يمناه عن فعل يمناك = واللي عن دروب المراجل عذرها
يا متعب ملوك العرب عز ممشاك = على الذي غيرك وجنب وعرها
اصبحت مثل الشمس ما بين الافلاك = ونجومها تطفي ويطفي قمرها
قروا لك اصحابك وقروا لك عداك = إنك حكيم أيامنا يا بصرها
يا ثابت الى اعترى غيرك ارباك = يا قادم الى انثنى من قهرها
يا مدرك لى ضاع بالناس الادراك = يا جبرها لى صار غيرك كسرها
يا نورها الى اظلمت كل الاسماك = يا برها يا جوها يا بحرها
ما هو كثير ارواحنا لو عطيناك = وقلوبنا يا من بحبه عمرها
الله يعزك يا معزة رعاياك = من راد يجمع ميزتك ما حصرها

[تسـ тsωαħήــوٍآهـن]

مرثية الفهد



مرحوم يا فهد العرب رمز الإسلام = مرحوم يا كاسر عصا جيش صدام
يا من وفا بالوعد للشيخ جابر = وعاد الكويت وطاح صدام ما قام
مرحوم ياللي عزها ما ظلمها = بالعدل والإحسان داره حكمها
يا خادم البيتين باني حرمها = ياللي بكته الناس وارضه والأيام
مرحوم يا فارس وحاتم زمانه = يا من اعز السيف والمال اهانه
ربي عطاه من المهابة مكانة = في حضرته تصير عدوانه أقزام
مرحوم ياللي ما يغره منافق = ولا يثيره بالغضب صوت ظافر
بالناس له نظره وعقل وخافق = ما هوب عجل لكن إن قام عزام
مرحوم يا ملجم جموح المعادي = اللي يثير الفتنة بكل نادي
ينثر سمومه بالحضر والبوادي = حتى عدل راسه على الحق صمصام
مرحوم يا راعي الوفا والحمية = يا كاسب الطولات جزل العطية
ياللي اذا نهض عزومه قويه = دايم وشوفاته بعيده وقدام
مرحوم يا ثالث سهوم المنايا = عقبان جو ما خلطهم حدايا
تشيلهم هاماتنا والحنايا = عبد الله وسلطان دام السعد دام

[تسـ тsωαħήــوٍآهـن]

طالت القامات



هل خير .. وحل خير .. وعم خير = ويسر الله كل امر في عسير
وامطرت سحابة الحب العظيم = والهوى في كل قلب له غدير
وغنت الأطيار واهتز الشجر = والزهر يفوح من عطره عبير

وكل وادي سال بجموع البشر = حادي الأشواق داعيها تسير
تضحك الفرحة على وجه البلاد = وكل قلب كاد من فرحه يطير
وارتفع في كل كف سيف عز = وطالت القامات باليوم الكبير


يا ولي العهد شرفت الجنوب = والرجال اللي تسابق بالمسير
من تهايمها ومن كل السراة = ومن سهلها جاك سيل له هدير
يهتفون باسمكم حب وولا = وينذرون عداك بالسيف الشطير

قادهم عهد لكم منهم قديم = يرخصون الروح لى صاح النذير
التلاحم والثقه والانسجام = بين شعب وقادته ما له نظير
بين بارود البنادق والسيوف = بالمحبة عانق الشعب الأمير


عرضة فيها الوطن لحن وقصيد = انتشى الشايب لها قبل الصغير
كل ناس يفرقون بميزة = والسعودي فرق ميزاته كثير
الشهامه .. والشجاعه .. والكرم = والوفا .. والحب .. والدين الغزير

[تسـ тsωαħήــوٍآهـن]

أعتز



أعتز إذا اختارني عمي = في نخبة الفكر أخاطبها
وامزج مع همومها همي = وبالصوت والحرف أجاذبها

وانقط الحرف واسمي = بعض المعاني واسببها
من غير مدح ولا ذم = عصية الفكر أرتبها

بالكيف ما هوب بالكم = هزيلة الروح أجنبها
تفرق الشعر والتم = في حضرة اللي يعربها

أخص الإبداع ما اعمي = ما لي بعجة هبايبها
واختار معناي واهتم = باللي يسنع ركايبها

[تسـ тsωαħήــوٍآهـن]

هني من كان سلطان عمه


افل محفوظ الحصيله والمه = واستبعد التافه واضم المهمه

وان ضاقت الدنيا تذكرت سلطان = لا واهني من كان سلطان عمه




حر قنص به فرخ .. صقر الجزيره = واخوه فيصل قدمه بالمسيره

له خبرة في كل درب غزيره = يجلي سماها لي اظلمت فيه غمه





ما يقبل الهزله ولا يقبل الهون = ممشاه عجل للمعالي وبالهون

له نظرة بالقلب والعقل وعيون =لا تقصر الشوفه ولا هي تزمه





هو شمسها لا غاب نور الكواكب = وذعارها لا صاح بالخيل راكب

وهو جودها لى شح بالغيم ساكب = خيره على الأدنى والأقصى يعمه





له فوق خمسين السنه ما ترجل = سرجه على صهوة اصيل محجل

واسمه على لوح الشهامه مسجل = ان قال يفعل وان تعهد يتمه




معروف بعزوم الرجال القويه = ومعروف بالكف العطوف النديه

واذا بغوا شجاع راي وحميه = تلفتت روس المخاليق يمه

[تسـ тsωαħήــوٍآهـن]

عاش راسك


يا سيدي عاش راسك عاش = عسى اكثر الناس يفدونه

شيخ لكل المراجل حاش = ما يتلي الناس يتلونه
صدره بحب العرب جياش =تضحك ثناياه وعيونه



ومخلاب صقر إلى من ناش =يفصل عن الهامه متونه

يا سيدي ما ارغب المطراش = لولا لزوم تعرفونه
اخاف من هرجة الأوباش = يمشون بالكذب يرمونه



ياما تمنيت لكن ماش = أسير مع ظلك ودونه

وما البس بدال الحرير خياش =ومن حبه القلب ما خونه
وان سلم راسك بردت الجاش= وما فات يا شيخ يا هونه

[تسـ тsωαħήــوٍآهـن]

سلطان


بالهون يا متعب قوايمك بخطاك = ما تستطيع الرجل تلحق هقاويك

ارفق على نفسك ودربك وممشاك = تعب القدم ..والدرب..واللي .. يباريك




يا شيخ هون خطوتك لا عدمناك = معذورة كان الرجل ما تماشيك
سبحان من سمح طريقك وقواك = درب الوعر تمشيه والله يقديك



يا ساعي للمجد .. والمجد يزهاك =المجد يا سلطان في كف اياديك

سمعتك طارت من ثرانا بالأفلاك = شمس يسير بنورها من حواليك



ان غابت الاخلاق تبقى سجاياك = واذا انتهى المعروف يبقى الكرم فيك

اسمك على فعلك يتوج مزاياك = سلطان خلانك .. وسلطان أعاديك

[تسـ тsωαħήــوٍآهـن]

لا باس

لا باس يا من له على ما قسى باس = عداك يا سلطان ربي خطرها
تسلم وتبقى للشرف رافع الراس = يا فرحة المضيوم ساعة كدرها

يدعون كل الناس من كل الاجناس = والله يقبل ما دعي لك باثرها
حبك غدا بقلوبهم ماله قياس = كم واحد نفسه لنفسك نذرها

شوفك وذكرك للرجاجيل نوماس = اللي يدركون الأمور وخربها
من حبه الله سخر لحبه الناس = والله يخص بنعمته من شكرها

[تسـ тsωαħήــوٍآهـن]

يا شيخ

يا شيخ اشوفك شارد الذهن مشغول = الله يعينك يا نطيح الثقيله
مثلك جعل الله على الناس مسؤول = من فوق حمله حمل غيره يشيله

ومثلك يذب الريع والحمل منقول = يقطع به الفرجه ولو هي طويله
ومثلك كما سيف شطير ومسلول = لى كبرت القاله فصلها فصيله

ومثلك يفتح بالرجا كل مقفول = ضحكة حجاجه كل هم تزيله
لا تشغل الخاطر ترى العبد مكفول = عادات ربي في عباده جميله

حكمة عزيز جاعل الغيب مجهول = والله جعل في كل قلب دليله
آمر ترى لازمك حاصل ومزهول = بارواحنا نشريه لو هي قليله

من راد بك شر دحرناه مخذول = ومن راد بك خير نرد بمثيله
يجزاك ربي عن سجاياك بقبول = كم ناصرت يمناك معدوم حيله

[تسـ тsωαħήــوٍآهـن]

عند الموادع


عند الموادع دمع عيني غلبني = وطاحت بي الدمعه على كف سلطان
احب يمنى عمي اللي حشمني = ومن لامني في حب سلطان غلطان

شيخ بالأخلاق الكريمه ملكني = بالمرجله فارس وبالرحمه انسان
ومن يزرع المعروف لا بد يجني = ومن يفعل الإحسان يجزى بالإحسان

واللي يريد المجد لابد يبني = في قلوب وعقول المخاليق بنيان
أفاخر بعمي على الناس واثني = ويستاهل البيضا سلايل كحيلان

له موقفل عند الملمات يثني = سلطان موقف والتجاريب برهان
إلى انتهض يكفي والى مد يغني = والى تكلم كل شي معه لان

والى وعد يوفي والى قال يعني = والى ارتكى للحمل شاله بليهان
بالطيب جاوز كل هقوه وظني = الله يوفقه السعد وين ما كان

[تسـ тsωαħήــوٍآهـن]

شعري بسلطان

ان كان ما دونت شعري بسلطان = يا علني ما قلت بيت ولا حرف
رمز الشجاعه والشهامه والاحسان = مزن المراجل كل ما نبعها جف

له ما قف ما ياقفه كاين كان = إلا الذي جفنه عن المجد مارف
ياقف ويضحك للشدايد بليهان = وان توخت له عن مطاريدها عف

عمي افاخر به ولاني بغلطان = عمي يشرف من له بمجدنا شف
عمي عقيد القوم والقوم فرسان = الواحد يوازي عن امثالهم ألف

وعمي سديد الراي في كل ميدان = ثقيل روز كل ما عاقل خف
سلطان ما مثله بذا الوقت سلطان = يسودها بالراس والقلب والكف

[تسـ тsωαħήــوٍآهـن]

الواجب أكبر

الواجب أكبر يابو خالد علينا = لو بعت أنا روحي فلا ظني أوفيه
ياللي لطلاب المعونة عوينا = كريم نفس وغالي المال تصخيه

لى جاك شكاي الهموم الحزينا = تشيل عنه الهم ويروح ناسيه
أنت الذي لك كل قلب يلينا = يجيك من جرحه عطيب وتبريه

وانت الأبو وانت الأخو والظنينا = وانت الصديق اللي نحبه ونغليه
إن جاز طرفك يا سنادي جزينا = ما تهتني عيني وعينك تقاسيه

لا تشتكي يا شيخ خل الونينا = واللي تبي لو كان بالروح نشريه
لا والله الا يا بو خالد مشينا = لوازمي تبقى ولازمك نقضيه

[تسـ тsωαħήــوٍآهـن]

أعظم الحب

أعظم الحب في اتفاق السجايا = وأبر الوفاء ما هو مذهب

كلما لاح فيصل في خيالي = شامخا وانتخيت يا لك من أب

لاح سلطان في صميم حياتي = وأراني أبي ..وجاء بأعجب

[تسـ тsωαħήــوٍآهـن]

غلا الناس

ليت المرض ينقل عن اللي نوده = والله لاشيله عن غلا الناس سلطان
شيخ جميع الناس ذخر تعده = ان ضاقت الايام واشتدت ازمان

ملجا الرفيق ومن بعد كان ضده = حتى العدو ينصاه لى ضاق به شان
ما احد وصل بالجود والطيب حده = وانا اشهد انه اكثر الناس انسان

كم واحد عن لحظة الياس رده = حتى زرع له بالأمل روض بستان
أما الشجاعه فاسأل اللي ينده = وعزى لمن لاقاه سلطان غضبان

يمناه اذا همت بحصن تهده = ويسراه ياما عدلت راس غلطان
وكل عطاه الله من الحمل قده = ونصيب ابو خالد هزع كل ميزان

وتضحك لها عينه وسنه وخده = ما كنها الا ريشة شالها حصان
يا الله ياربي من العمر مده =كم عين محتاج ترجاه باحسان

[تسـ тsωαħήــوٍآهـن]

هذه القصيدة تكرم وأرسلها صاحب السمو الملكي الأمير سلطان بن عبد العزيز
بمناسبة دخول شاعرنا الأمير خالد الفيصل لمستشفى الملك فيصل التخصصي
الله لا يعيد الشر ..

زايل الشر

زايل الشر سالم يا قوي العزايم = يا رفيق السعد يا شايل هم غيره

ما يلام الفواد اللي نقل له عظايم = لو تعب واشتكى مير الله اقوى يجيره

بالغلا يابو بندر مالنا فيك لايم = يشهد اللي رقيب عالم بالسريره

عل قلبك سليم يسعد الناس دايم = بالوفا والمحبة خالد في مسيره

يا أمير الشعر يا اللي بك الشعر قايم = ما جرى لك من المولى عسى فيه خير

[تسـ тsωαħήــوٍآهـن]

هذه القصيدة قيلت ردا على القصيدة السابقة ..

عاش للمجد


عاش للمجد سلطان به الجود زايم = قدمته المكارم في نحور المسيره
ما ينول المراجل كود خصم الخصايم = مثل ابو خالد السلطان كل ديره

طبت من كلمتك لي يا قوي الشكايم = استمد العزايم منك وارقى عسيره
يا طبيب القلوب اللي مرضها هضايم =في زمان صغيراته غدت بالكبيره

ويا ظلال الوجيه اللي شوتها السمايم = ما لقت بالمظامي مزبن تستجيره
ويا دليل العقول اللي تخبط هوايم = كنه الجدي في ظلماتها نستشيره

ويا ربيع الهقاوي عقب ما هي هلايم = من تعلق جنابك يرتوي من غديره
حاضر بالمراجل مثل ما هي قدايم = امسك ويومك وباكر معك له ذخيره

[تسـ тsωαħήــوٍآهـن]

سلطان المواقف

يزين القاف وتزين المعاني =الى ذوبت قلبي في لساني
حلاة الشعر في صدق المشاعر = اعبر فيه عن ما في جناني

اذا قلت الشعر في عمي اطرب = يسابقني يراعي في بناني
اجل المدح يقصر عن جنابه = وأرفع وصف ما هو منه داني

تواضع والكريم اعطاه هيبه = ولان وكل عسر معه لان
تميز بالكرم وبحسن خلقه = شجاع يود ذلات الجبان

تزود همومه ويضحك حجاجه = تحسبه ما عرف هم الزمان
وهو من كابد صروف الليالي = وجرب كيدها سر وعلان

وهو سلطان في كل المواقف = بنى له في سنام المجد شان
تخير منزله لله دره = امير بكل مفهوم المعاني

[تسـ тsωαħήــوٍآهـن]

للدار وحشه


للدار وحشه عقب سيد هل الجود = وعيني غشاها عقب شمسه ظلال
ما لوم رجلك لو شكت كايد الكود = أتعبتها ترقى سنود المعالي
للجسم حد وغايتك ما لها حدود = ظلمت نفسك من قديم وتالي

تمشي وعرها كنه سهود ومهود = لله درك ما تغاليت غالي
ما تنتظر للجود يا شيخ مردود = تشرب مرار وتسقي الغير حالي
ما ينثني عزمك خطير على الزود = من عالي تجمح على راس عالي

يا طيب طابت لك البيض والسود = اسرت في حبك قلوب الرجال
يفوح مع ذكرك شذا الورد والعود = وكل ينعم لك إلى جا مجال
مرضك يمرضني وسعدك لي سعود = يا ليتي انقل عنك ضيم الليالي

[تسـ тsωαħήــوٍآهـن]

أهدى الأمير سلطان بن عبد العزيز الأمير خالد الفيصل
طيرا فقال الأمير خالد يشكر عمه :

الطير يا عمي

الطير يا عمي با سميه سلطان = يا حيث به من شخص عمي مواري
طير السعد طير الهدد طير حوارن = صقر الرجال أصخى بصقر الحباري

كل على جنسه رفيع وله شان = وأنا بهم يا اهل المعرفه اماري
عمي صليب الراس عمي كحيلان = عمي على كسب النواميس ضاري

[تسـ тsωαħήــوٍآهـن]

تنشد عن الحال


تنشد عن الحال حالي كيف ما شفته = وانا احسب انك قبل ذا الوقت تدري به
في خاطري لك كلام مير ما قلته = أجنبك ما يحسك لو حياتي به

هم جديد على الأول تحملته = عنك اتحمل كبير الهم وامشي به
رحت اتمثل بطبع لك تعلمته = لى صار لك غالي لياك تشقي به

[تسـ тsωαħήــوٍآهـن]

وزن الحكي

قرأ الأمير خالد الفيصل في لقاء صحفي قول سمو الأمير عبد الله الفيصل
( كنت أستاذا لخالد، وهو الآن أستاذي ) فكتب الأمير خالد
هذه القصيدة :


يا سيدي يا خوي يا أستاذ عمري = علمتني وزن الحكي قبل الأشعار
إن جاز لك يا سيد الشعر شعري = تراه من فضلة معانيك تذكار
مديون لك بلسان قلبي وفكري = باللي يصير وبالذي ما بعد صار

علمتني وانا بالأحوال ما ادري = ودليتني وانا بالأيام محتار
فتحت لي صدرك وغذيت صدري = وحطيت به للعلم والعرف مقدار
ومديت لي يمناك من يوم صغري = ونقلتني من صغر لكبار واكبار

واجلستني في مجلس العلم بدري = في مجلس للفكر وقفه ومسيار
واسقيتني نبع من الجود يجري = عليه وارد ونازل وصدار
واسمعتني ترنيمة المجد تسري = من جدك الأول إلى نسل الأبرار

ومديت لي شوفي ورا حد عصري = وشاهدت أنا المسرح قبل رفع الأستار
ولولاك ذاك الوقت حيرني أمري = ولولاك ما جالي على الصبر مقدار
ودي أعبر عن جميلك وشكري = لا شك مالي مقدريه ولا كار

محدود شعري يا أشعر الناس عذري = فضلك بحر والشعر مقطور قطار

[تسـ тsωαħήــوٍآهـن]

هذه القصيدة كتبها شاعرنا الأمير خالد الفيصل بعد عملية جراحية
في القلب أجريت لشقيقه سمو الأمير سعد الفيصل عام 1409هـ ..

يا جريح القلب

يا جريح القلب بي عنك الجروح = جعل قلبي فدوة لك يا سعد
مشرط الجراح في قلبي يروح = كل ما هوجست بك يوم الأحد

خفقة تجزع وخفقات تنوح = عالجوا جرحك وجرحي بك قعد
يشهد الله لو تعوض الروح روح = يا ابن ابوي فداك روحي والجسد

يا جحود الضيم ما ودك تبوح = بالخفوق جروح ولسانك جحد
شلت حب الناس بالقلب النصوح = لين صار الحب بعروقك سدد

سمح الله درب ذا الوجه السموح = زال شرك والمقابيل السعد

[تسـ тsωαħήــوٍآهـن]

أمحروم

أمحروم عفوا لدي سؤال = وهبني بربك صدق المقال
رأيت غزالا يجوب الربى = ليرعى المشاعر صعب المنال

رياض القلوب له مرتع = يداعب لهوا نسيم الشمال
وددت اصطياد الغزال الجميل = فصوبت سهمي نحو الغزال

وكنت القدير بتلك الفنون = ظننت التخلص مني محال
وما كنت احسب صيد الظبا = أشد من الحرب يوم القتال

فكان السليم وكنت المصاب = وردت إلى القلب منه النبال
أجبني أجبني نديم الهوى = متى كان للظبي صيد الرجال

[تسـ тsωαħήــوٍآهـن]

يا خوي

قيلت هذه القصيدة بمناسبة إجراء عملية جراحية لصاحب السمو
الملكي الأمير عبد الله الفيصل في النمسا عام 1411هـ ..

من ونتك ونيت تسعين ونه = يا ليتها بي وانت ما عاد ونيت
يا ليتها بي وانت ما جاك هنه = كل ما سمعتك قلت يا ليت يا ليت

يا خوي عمري لك ولا فيه منه = أفديك بالغالي وبالحي والميت
لى شفت من له وسط قلبي محنه = في ناظره شكوى وصدره تناهيت

ضاقت بي الدنيا وصديت منه = وارسلت لله دعوتي له وصليت
لو المرض ينشال شلناه عنه = ولو المرض رجال بالسيف رديت

هني من له مثلك أخو مضنه = بالطايله يذكر وبالجود له صيت
حب أجاهر به وحب أكنه = والحب يظهر لو تداريت واخفيت

[تسـ тsωαħήــوٍآهـن]

نوى القلب

نوى القلب نيه ما نواها لاحد غيرك = نوى القلب يمشي لك على السمع والطاعة
مع الشك والغيره وهجرك وتقصيرك = أحبك واقول أمرك له الروح خضاعه

جمعنا طريق الحب وانور بتنويرك = على صدفة لقلوب الأحباب جماعه
ملكني هواك وقادني بامر تدبيرك = أمانه معك روحي من البعد ملتاعه

تغزلت بك والشعر من بعض تعبيرك = كلامك سحر يخلف موازين سماعه
تقول الغزل مني شغل كل تفكيرك = عسى واعسى والنفس بالزود طماعه

[تسـ тsωαħήــوٍآهـن]

فدوة عيونك

فدوة عيونك لو غدت روح مغليك = وش عاد لو راحت لعينك عشاير
ابيع ما يغلى على الكون و اشريك = و اسوق لَى جتني علومك بشاير

و ازعّل جميع الناس بالحيل و ارضيك = و اصبر ولو دارت علَيّ الدّواير
و آخذ من ايّامي لك ايام واعطيك = وان راح عمري لك فلا هو خساير

احب انا شوفك و صوتك و طاريك = دايم وفكري فيك هايم وحاير
بالصمت اهوجس بك و بالصوت اناديك = و الله عليم البيّنه والسّراير

انا و قلبي و الهوى بين اياديك = عندك مفاتيح الهنا للضماير
من روحي احبك ومن روحي افديك = يامن غرامه و الحسن فيه ثاير

[تسـ тsωαħήــوٍآهـن]

مرتاح أحبك

مرتاح احبك ولا علمت = حتى انت عييت ابين لك
والبارحة يوم أنا سلمت = شكيت لو عيني تدلك

برق لمع بالعيون وخفت = مواجع القلب توصل لك
عساك في ناظري ما شفت = كيف المعاليق يومن لك
من خوفتي لا احترق جنبت = هربت من شمسك لظلك
أخشى عليك الهوى لو طحت = ما تلني يمك يتلك

أبي قليلك ولا حصلت = بعضك تركني مع كلك
ما ادري صواب او خطا ما قلت = إنك حبيبي وانا خلك

[تسـ тsωαħήــوٍآهـن]

يا صاحبي

يا صاحبي مني لك الروح مهداه = والله لو به غيره أغلى هديته
ما قلت لاحد غيرك الروح تفداه = انت الوحيد اللي بروحي فديته

وانت الذي لولاك ما قلت أنا آه = ولا شكيت من الهوى ما شكيته
يا زين حبك عن هوى الناس عداه = جميع وصف كامل بك لقيته

سلم المحبة ما وطا الزين ناطاه = حد الخطر لعيون خلي وطيته
واللي يودك كل ما منك يرضاه = حتى عذابك يا حبيبي رضيته

[تسـ тsωαħήــوٍآهـن]

تدلل علينا

تدلل علينا يا سمي الظبي وش عاد = تدلل ولك بامر الهوى شافع عندي
ولك في خيال الشاعر المهتوي ميعاد = ومجلس على غيمة وليلة قمر نجدي

اسافر معك لبلاد وانزل معك في بلاد = ومن غيمه لغيمه ولا للسما حد
رسمتك ضحوك الفجر يا فرحة الأعياد = ولمعة شعاع ينغمس في ندى ورد

وغنيت بك صوت لقلب الهوى ميلاد = ونغمة غرام ذاب في لحنها وجدي
أشوفك مطر هتان لا برق ولا رعاد = من الوسم يبعث بالصحاري زهر ودي

أحبك وصل وبعاد أحبك رضا وعناد = ولا يختلف وعدي ولا ينتقض عهدي

[تسـ тsωαħήــوٍآهـن]

بشروني عنك

بشروني عنك ما يدرون عني = ما دروا باللي شغل فكري وظني
اتسمع للحكي بك واتحفظ = خايف دقات قلبي يفضحني
كل ما سموك باسمك فز قلبي = والضماير والمدامع شاغلني

يا حبيبي يوم جنبت الحبايب = عفت لاجلك كل من قبلك فتني
من عرف قربك عرف طعم السعاده = وان تشطرت ادرك غبون التمني
في هواك من العسل لذة مذاقه = لكن حروس النحل عنها حدني

ما عد اسمع بك ولا اوحي فيك عاذل = والعذارى جهل لو داعبني
لك عيون فعلها بي فعل ظالم = من عرفتك يا الغضي ما ريحني
إن تفارقنا تغايا لي بليلي = وان تقابلنا دهني واخجلني

[تسـ тsωαħήــوٍآهـن]

ساعة الفرحة

يا ساعة الفرحة تشوقت للعيد = عيد العيون وعيد قلب الصبابه
رد الجمال لشوفتي يا اتلع الجيد = واسحب على حرفي لحون الربابه
حرفي بصوتك يا اجمل الصوت تغريد = يا رمز حبي هاك رمز الكتابه

يا صبح عمري فيك للعمر تجديد = وحبك يجدد كل يوم شبابه
للعين والقمرا وحسنك مواعيد = وليل الهوى شرع للأحباب بابه
ياما زعجت الصوت باسمك تراديد = وياما نسيم الوجد يمك سرابه

ويا ما تمنيتك على باقي الغيد = واقول مثلك يا غلا الروح ما به
أبيك تهوى مثل ما اهواك وتزيد = يا من خفوق القلب حسنك غدا به
يا قطرة الغيمة على يابس البيد = رد الحياة لخافقي يا ذهابه

--------------------------------------------------------------------------------

[تسـ тsωαħήــوٍآهـن]

من كثر حبي

من كثر حبي لك تركتك وصديت = والقلب خالفني عليك وتركني
من شان عينك هنت عيني وضحيت = وش عاد لو سهر الليالي هلكني

أبيك وابعد عنك حبي وانا ميت = والوم حظ بالبلاوي شبكني
واذا دعاني حبي الذات عييت = أحبك اكثر يا عذاب ملكني

لاجلك جميع ظروف وقتي تحديت = حتى الفراق اللي بضرسه علكني
لا ما تخلى الحب ولا تخليت = كل ما بغيت اعود يمك مسكني

[تسـ тsωαħήــوٍآهـن]

أجاذبك الهوى

اجاذبك الهوى واطرب واغني = وابادلك الغرام بكل فن
واشاهد صنعة الله في جمالك = وحكمه الذي فيك امتحني

واشوف الود في عيونك ولكن = يرد الود خوف فيك مني
ولا ادري وش يخيفك يا حبيبي = وانا بك مغرم جاك متعني

ولو انك تلاحظ شفت عيني = وهي تروي حديث الحب عني
تنعم دام توك في شبابك = ليال العمر ما قط أمهلني

تعال اسقيك من جدول غرامي = شراب فيه للعاشق تهني
واهيم بك بسماوات المحبه = إلين انك بعد مثلي تغني

[تسـ тsωαħήــوٍآهـن]

مالوم قلبي

مالوم قلبي لى انتفض عند طاريك = والعين تبكي شوفتك يا عناها
يا ليتني ما اشد عن جال واديك = واشارك الخلان صافي هواها

اقعد معك واشوف زولك واحاكيك = واوصل النفس الحزينة مناها
ياما حسدت ربوعك اللي حواليك = بالشوف يوم الله بقربك عطاها

اهواك انا واشتاق بالحيل واغليك= وارهي من اسبابك على العين ماها
ما نيب والله يا هوى البال ناسيك = مادام لي روح بوصلك هناها

[تسـ тsωαħήــوٍآهـن]

تعال أسهر

تعال اسهر معك يا اسمر عشيه = تعال اسلي خاطرك يا عيوني
تهن وخل عيني بك هنيه = انا وياك والدنيا تهون

ترى الدنيا لياليها شقيه = حذاري تستبد بك الظنون
نويت وكل قلب فيه نيه = على اني لك وفي روحي تمون

هواك بخاطري سوا سويه = تركني بين اياديك معنون

[تسـ тsωαħήــوٍآهـن]

جمال الروح

كتبت من الشعر في كل معنى = ولكن وصف زينك ما بلغنا
أنا وش لون اوصف زين روحك = وذاتك حسنها ما قد شهدنا

أشوف الصبح في طلعتك باسم = وبك خجلة غروب الشمس شفنا
تجي مثل الكرى سلطة حضورك = وما تبغيه من حلم حلمنا

نشيت بعالمي منشا سحابه = يسابق نبتنا فيها زهرنا
أحبك حب صقار لطيره = يعاف النوم لو ريشه تثنى

واحبك حب شاعر للقصيدة = ان جت ون وان عيت يونى
واحبك حب فنان لفنه = عصر روحه على شانك تغنى

واحبك حب هاوي للهوايه = قضى عمره ولا ادرك ما تمنى
واحبك حب من يفداك عمره = فتح قلبه وخلاك اتحنى

[تسـ тsωαħήــوٍآهـن]

إمسح الدمعة

امسح الدمعة ترى ضعفك قوي= انهزم قدام ضعفك يا غلاي
امسح الدمعه بعمري لو تبي = عطني احزانك وخذ مني هناي

امسح الدمعه قبل تقضي علي = دمعتك تغرق صباحي في مساي
لا تروع مثل روعات الظبي = روعتك يا روعة ايامي بلاي

كل ليل مع نهارك ينجلي = يا بدايات الهوى يا منتهاي
يا وطن قلبي وغربة ناظري = يا احتياري يا صوابي يا خطاي

يا بنات الفكر غني وارقصي = عند خلي وانشدي له من غناي
وسعي صدر الحبيب واطربي = طربتي له كلما ذعذع هواي

[تسـ тsωαħήــوٍآهـن]

أحب الناس

أحب الناس لا تبطي علينا = ترانا لو شربنا ما ارتوينا
أمني عيني بشوفة جمالك = لعل الوقت يسمح لك تجينا

يفز القلب لك مع كل هاتف = عسى الله اللي ما نسينا ما نسينا
أنا لك مثل برق في سحابه = تولعني واصوت بالحنينا

وانا لك مثل صقر عقب حومه = تنكس لين وقع باليدينا
وانا لك مثل نبت ظامي لك = اذا جاه الوسم عوده يلينا

وانا لك مثل شاعر للقصيده = يغني لو بكا قلبه حزينا
ترفق يا حسين الدل تكفى = ترى والله ما غيرك بغينا

إذا مرتك نسمة شوق تسري = تراها داعي الأشواق فينا
تلطف .. ثم تلطف ..ثم عود = ترى لو شافني صخر يلينا

ولو تسمع نجوم الليل شعري = مشت لك تطلبك ترفق علينا

[تسـ тsωαħήــوٍآهـن]

فز الخفوق

فز الخفوق وقلت يالله عسى خير = أثر الليالي عاد غايب قمرها
مع شوفته نشوة وفزه وتخدير = وعيون خلان تعانق نظرها

يفز له قلبي كما فزة الطير = والرجل كن اللي تحتها غدرها
يا صبح عمري يا صباح التباشير = نوره ملا قلبي وروحي غمرها

عقب الفراق اللي تعدى المحاذير = يبس غصون القلب جافي دهرها
ربع بروحي عقب ما هي معاسير = سحابة هلت بقلبي مطرها

واسقى بها زرعة هوانا بتقدير =غراسة غرام بالمحبة بذرها
يا عاذلين العين والله مخاسير = واللي درى عن حال عيني عذرها

تشوم عيني عن جميع الغنادير = وان ناظرت عيني فوادي نهرها
يا ناس أحبه والمحبة مقادير = هذا هوى نفسي وهذا قدرها

والحب ما له يا هل الحب تفسير = قلبين والله بالمحبه أمرها
لى جيت أصور حالة الحب تصوير = وارد عن حالي لخلي خبرها

لقيت وجدي فوق كل التعابير = كل الشعر قطره وشوقي بحرها

[تسـ тsωαħήــوٍآهـن]

يا طالبين الود

يا طالبين الود لا باس غالين = لا شك في قلبي غلا ذاك فارق
هذاك لو شفته وحنا مغلين = أشوف في عينه سنا الصبح شارق

وهذاك لو قلنا عن الزين سالين = وقف على باب الهوى منه طارق
وهذاك لو سافر وشدوا بعيدين غديت أنا في بحر الأهوام غارق

وهذاك ما قابلت مثله نديمين = يسرقني بعينه وانا احب سارق
وهذاك لو صفوا جنبه مزايين = يصير كنه في دجى الليل بارق

عهد علي ما دام في عمري سنين = اني لاخلي غصن الأحباب وارق
وان مت انا ربي يعيضه بحيين = وياسم على كبده سواتي مطارق

[تسـ тsωαħήــوٍآهـن]

زانت بحبك

زانت بحبك حياتي يا حياتي = من عقبكم صفوي تكدر عليه
يا دعوتي باول وتالي صلاتي = ويا نيتي ما دام للحب نيه

يا حلم صحواتي وغفوة مباتي = ويا رغبتي من بين كل البريه
أحاول اجمع في غيابك شتاتي = بعضي معك عيا يفارق خويه

أرواحنا بالحب متعانقات = وقلوبنا بالشوق والوجد حية
وش لون تقوى سيف زينك عصاتي = يا بو عيون كلها جاذبيه

خذ من حبيبك كل عمري وهات = بلسم جروحي يا حبيبي عطيه

[تسـ тsωαħήــوٍآهـن]

يا من سلامه

يا من سلامه لي هلا يا حبيبي = والله هلا بك يا محبة عيوني

هلا هلا يا لون شمس المغيب = يا نسمة الليل العطوف الحنون

يا بدر لا هليت لا عاد تغيب = ترى سواد الليل كحل جفوني

انا دخيل الرمش خلك قريب = ياللي بقربه كل شي يهون

[تسـ тsωαħήــوٍآهـن]

ليت العمر يهدى

ليت العمر يهدى .. ابهديك عمري = تستاهل الأيام يازهو الأيام
لو الهوى المحبوس في جوف صدري = يظهر على العالم غشى العالم هيام
فيني غرام فوق محمول صدري = وفيني خيال فوق تصويرالأحلام

صباحي أسرح لك وفي ليلي أسري = والى هجع فكري خفوق الهوى قام
والله ما لي غير الأشواق عذر = واللي عرف شوق المواليف ما لام
يا من يبيع الصبر يا ناس واشري = محتاج كل الصبرواصخي بالاقيام

يا مالك أمري وش نواياك بامري = ارحم خفوق عن هوى غيركم صام
حالي غدا مثل المساويك مبري = يا باري حالي ترى البعد ظلام
ادري بحالك وانت بالحال تدري = يا الله عسى ذا العام أحسن من العام

[تسـ тsωαħήــوٍآهـن]

الولع غنى

الولع غنى وانا فيني ولع = هاضني مغناك يا ورق الحمام
مثلك اصوت ولا حي سمع = ما لقيت احد ولو ينقل سلام

غيبه عني زماني وانقطع = ول يا وقت التفرق والهيام
وين غيبت اللي بقلبي زرع = زهرة الأشواق وغصون الغرام

يا قمر عمري إلى منه طلع = خيمت عقبك دياجير الظلام
كل حر لين ضيق به جزع = القهر يا صل به حدود العدام

كل ما لمته هوى قلبي شفع = ذا حبيبي كيف محبوبي يلام؟
لو تمادى بالتغلي والدلع = ما تمادى بالقطيعة والخصام

[تسـ тsωαħήــوٍآهـن]

سرى سرى

سرى سرى مع ساري الليل بالي = الشوق داعي والموده دليله

على جناح الليل ميل ومال = في رحلة لاهل العيون الكحيله

أنا وهو لو باعدتنا الليالي = بين القلوب عناق خل وخليله

يا غالي الهاجوس هاجوس غالي = شلني معك في جو ضافي الجديله

في ليلة قمرا هواها صفا لي = لى غاب بدر الكون خلي بديله

[تسـ тsωαħήــوٍآهـن]

ذكرتني

ذكرتني طلعة البدر نور عيوني = يوم شفته هلت العبرة المخفيه
من يلوم المغرم المولع المفتون = لى تذكر شوف أبو وجنة ورديه

ليتهم يا سعود لى روحوا مروني = مع غروب الشمس بقفاية العصريه
أتمنى والتمني يزيد غبوني = غيبو يا خوك ما عندهم ماويه

ليتني في سجتي رحت ما صابوني = من يداوي الجرح والعلة الدخيله
خبروني عنه ضاق الحشا بشجوني = ما قويت الصبر حبه تمكن فيه

[تسـ тsωαħήــوٍآهـن]

المهل ساعة

المهل ساعة عسى البسمة تدوم = ظامي للحب من يومك أصوم
بلّـل القـاع اليبّـاس الميّتـه = إحيها من ديـم هتّـان الغيـوم

أقرب أضمك بجنحـان الهـوى = أقرب أورّيك رقصـات النجـوم
وخلّني ألفّـك بطيـف الشعـاع = فوق مزن بالهوى دايم تحوم

ألمس بكفك مواجيـع الهـوى = واطرد من القلب وخزات الهموم
بيني وبينك من العشق اجملـه = أطعمْ واشهى من طيوف الحلوم

استضافتنـا الّليـال العاشـقـة = اشعل الضيّان واصحى لا تنـوم
لا تفوّت فرحة العمـر القصيـر = الغثا متوفر فـي كـل يـوم

[تسـ тsωαħήــوٍآهـن]

ساري

ساري واصوت لك أبيــــك
النظــرة في عيوني تبيك
والرعشة في قلبي تبيك

ســــــــــاري

*****

شعوري ذا الليله غريب
كيف الحبيب يشكي حبيب

أنـــــــــــــا ملكتك وانا فقدتك
ليتني لما عرفتك مــا تركتك

ســــــــــاري

*****

لمـــــــــا عيوني عانقوك
في غمضه وحده ضيعوك
اسأل زمـــــاني والمكان
أجمــــع سواليف الحنان

أنـــــــــــــا ملكتك وأنا فقدتك
ليتني لما عرفتك مــا تركتك

ســــــــــاري

***

قلبي وليلي بـــــه سرى
واللي جرى لـي ما جرى
أمشي وادور في الوجوه
تـــــــــــايه عيونك توهوه

ســــــــــاري

[تسـ тsωαħήــوٍآهـن]

قال الوداع

قال : الودع وقلت : ريع لي شوي = اصبر ترى عمر السعاده ثواني
قال: الظروف وقلت : عن ظرفها عي = تعال وقف ساعتك في زماني

قال: احترق في شمسها وانت في في = وما كل ما غطى عيوبك كساني
قلت : العفو اصبر على حامي الكي = واكسيك من صبري كساوي حناني

قال : الحقيقة شي وا حلامنا شي = والشاهد الله ليت هذا مكاني
قلت : الوعد قال : الوعد يا بعد حي = لى صاح لك قلبي وقلبك دعاني

[تسـ тsωαħήــوٍآهـن]

حدني وقتي

حدني وقتي على شي جديد = السهر ما هوب من عادة عيوني
أبعدوني عن هوى بالي وسيدي = ومنعوا عني خطوطه يا صلوني

شطروني عنه في دار بعيده = حسبي الله كانهم منه قطعوني
صارت الفرقا لنا علم وكيد = ليتهم راحوا وانا عنده نسوني

عاقني عن صاحبي سور حديد = دونه البحور حراس ودوني
الرجا بك يا بو خالد يا عضيدي = لا تخليني تراهم عذبوني

[تسـ тsωαħήــوٍآهـن]

ياصاح

يا صاح انا قلبى من الحـب مجـروح = جرح عطيب ما لقى له مـن يـداوي
لو ينشـرى قربـه شرينـاه بالـروح = مير البلا شوفـه غـدى بـه هقـاوي
أهل دمـع فـوق الاوجـان مسفـوح = على الذى مـا هـو بـالغـدر نـاوي

انا ادرى انه مثلـي اليـوم مطـروح = لاشـك مـا يقـوى و لانـي بقـاوي
لولاي ادارى سر الاحبـاب لا ابـوح = و ابيـع بيعـة الهبـيـل الـفـداوي
لكنى اجحد فيـه عـن كـل مفضـوح = خوفي عليه مـن الحكـي و الدعـاوي

حسبي على اللى حط فى الدرب ساموح = العذيـل اللـي جـرّ كـل الـبـلاوي
مـن اول بـاب المواصيـل مفتـوح = يـوم ان عـذال الـمـودة خــلاوي
واليوم يسد الباب لوح علـى لـوح =و امسيت انا يا صاح قلبـى شقـاوي

[تسـ тsωαħήــوٍآهـن]

رد السلام

رد السلام وثن = يا قمري البان
بلغ بعيد المنازل وحشة عيوني

قلب الصبابه ون = بالحيل ولهان
يا خابرين الموده لا تلوموني

الكيف يمه عن = والفكر وداني
وان ما سبقته يجيني طيف مضنوني

ذبحة عيونه فن = ظالم وفنان
من غير مقتول عينه مات ممنوني

يا مستريب الظن = بالظن حيران
قلبي على العهد يامامون ما موني

شل يا حمام وغن = غرد بالالحان
عسى يجوز لحبيبي شادي لحوني