ومَازَالَ فِيْ الأِبْداَعْ مُنْتَجَع ٌ لِلِشَقَاْءْ وَفي الرِيْح مِنْ تَعبه بَقَايَا [الأرشيف]

ملاك السلطان

12-18-2007, 11:55 AM

http://www.5foq.net/uploads/7200c9c417.gif

http://www.grooor.com/up/uploads/8ab20e1dd6.jpg

فـهـد المـسـاعـد .. بدون رتوش ..

** ( إنت زعـلان ) ** (http://www.dwaihi.com/poem/28fmusaed8.ram)

أسـمـعـك يـا اللـي تـناديني .. يا أبو قلبٍ خلي

----------------------------------- بس أنا ماني خلي القلب لا جل اسكت واجيك

الـخـلـي مـا هــوب قـلبٍ مـن هـيامك مـمتـلى

----------------------------------- الـخـلـي قـلـب آدمـيٍ شـافــك ولا هــــام فـيـك

إنــت زعـلان لجـفاي .. وما دريت أن زعلي

----------------------------------- يـوم قـلبـك ما يـبـيـنـي .. قـد مـا قـلبـي يـبـيك

حـتـى لـو عـيـت هـمـومـك في غـيابي تنجلي

----------------------------------- كـل هـذا مـا يـساوي لـهـفـتـي يـوم احـتـريـك

وكان ما صدقت هرجي .. طيب اسمع ما يلي

----------------------------------- يـا حبـيـبـي يـا عـسـى ربي يحـفـظك ويهديك

جـايـز انـك فـي غـيـابـي .. تـقـلب الدنيا علي

----------------------------------- بس أنا من قـبل أعـرفـك .. قالب الدنـيا عليك .

http://www.alqnas.com/vb/attachment.php?attachmentid=41936&d=1170094936

ملاك السلطان

12-18-2007, 11:59 AM

* * *

** ( سـالفة عشـّاق ) ** (http://www.dwaihi.com/poem/28fmusaed12.ram)

من بغى الفرقا لقـى لـه عـذر واسبـاب ودليـل .... خل عنـك العـذر والاسبـاب دام الحـب ضـاع

كان ودك بالفراق .. ابشر عسـى عمـرك طويـل .... لاتـردد وانـت لـك كلمـه ولـك امـر ٍ مطـاع

لـي عليـك انّـك تبّـت بكلمـة ٍ تشفـي الغليـل .... ولك عليّ انـي لأوّقـف وقفـة الرجـل الشجـاع

لاتجاملني مخافة ( قال ) مـدري خـوف ( قيـل ) .... عمر ( هرج النـاس ) مايسمـن ولايغنـي جيـاع

كان قصدك ( سر حبك ) .. اوعدك لأصبح بخيـل .... واحمل اسرارك معي للمـوووت قـدر المستطـاع

بس قلها ... قل ما احبك ... وابشر بصبر ٍ جميـل .... لاتحسب أني مثـل مـن طبعهـم لـوي الـذراع !

صاحبـك ماهـو كـذا ياصاحـب القـد النحـيـل .... صاحبـك طبعـه غريـب وغربتـه غربـه طبـاع

فـي الهـوى مايقبـل الحـل الوسـط ولا القليـل .... مثل ماهو لاشـرى يشـري .. ليامـن بـاع بـاع

ثابت ٍ لو هـي تميـل الارض حـدره ... مايميـل .... يـدري ان الفقـر ماهـو عيـب والدنيـا مـتـاع

ماعشـق لـذّة حياتـه كثـر عشـق المستحـيـل .... ولا كـره حتـى مماتـه كثـر كـره الأنصـيـاع

كم تعلّـم مـن شديـد البـدو وش معنـى الرحيـل .... وكم تعلّم من غروب الشمـس وش معنـى الـوداع

وكم تعلّم من سحاب الصيف وش معنـى الحصيـل .... وكم تعلّم مـن ليـال البـرد وش معنـى الضيـاع

ايه انا هذا طريقي ( موحش .. وصعب .. وطويل ) .... وانت لامنـك تعبـت .. العالـم فجوجـه وسـاع

اعتبرنـي فـي بدايـة سكّـتـك عـابـر سبـيـل .... و رح وانا قلبي معك من ويـن وجّهـت الشـراع

يكفي اني لاانذكرت فـي سالفـة عشّـاق .. قيـل: .... عاشر احبابه شجـاع .. وفـارق احبابـه شجـاع

* * *

ملاك السلطان

12-18-2007, 12:02 PM

* * *

** ( هديـة عيـد ميـلادك ) ** (http://www.dwaihi.com/poem/28fmusaed17.ram)

حبيبي جيت اقـدّم لـك هديـة عيـد ميـلادك .... وانا متأكد انـي لـو نسيتـك مانقـص قـدري

ولكـن قلـت ادوّر أي شـيّ يناسـب ّعيـادك .... تصفحّت الهدايا لين ضـاق بشوفهـا صـدري

أبي شـي ٍ يجمّلنـي معـك لا فـاح رينـادك .... مابي شي ٍ أمدّه والخجل من فوقـي وحـدري

وقلت آشوف بعض الناس قبل يحـل ميعـادك .... وش اللي من هداياهم يليـق بوجهـك البـدري

بعضهم جاب ورد .. وشفت كل الورد مافـادك .... وانا اصلا أعتبر من جاب ذاك الورد مايدري !

لأن الورد لـو مـازاد بيـن إيديـك مـازادك .... تركت الورد ذبلان .. وذكرت اللي سروا بدري

هديتهم قفص وطيور .. قلت ف عيـد ميـلادك .... اسوّي مثلهم واهديك طير ٍ في قفص صـدري .

* * *

ملاك السلطان

12-18-2007, 12:03 PM

* * *

** ( المدينـة والغـريب ) ** (http://www.dwaihi.com/poem/28fmusaed5.ram)

جا يشـوف الحـال كيفـه بعـد ماهـزه حنينـه .... وقبل يسألني سألتـه : كيـف حالـك يالحبيـب ؟

قال : انا كنـي غريـب ضيـع دروب المدينـه .... قلت : انا كنـي مدينـة تنتظـر رجعـة غريـب

قال : اجل وش فيك تكره سيرة الحـب وسنينـه .... قلت : أجل وش لون ما اكره سيرته دامك تغيـب

انت لا من غبت حتى مرايتـك صـارت حزينـه .... كيف ما تبغاني أحزن وانت لي حظ ونصيـب !؟

الهدايـا و الرسـايـل و المكاتـيـب الثميـنـه .... والليالي و القمر و الريـح و الكـون الرحيـب

كل ما تبعد .. تجيـب الشعـر ليـه مـن يدينـه .... و تقعد جروحـي تـودي فالطواريـق و تجيـب

يا بعـد كـل القصيـد و نـزوة حـداه و انينـه .... لا ذكرتك لاح بيت .. و طاح ورد .. و فاح طيب

و ان نسيتك ما نساني صوتك المبحـوح لينـه.... ياخذ لجرحي بثاره مـن خطايـاك و يطيـب

و بعد هذا جـاي ترمـي ذنبـك بوجـه المدينـه .... مـا دريـت ان المدينـه كلهـا شمعـة غريـب .

* * *

ملاك السلطان

12-18-2007, 12:05 PM

* * *

** ( خــلاص ) ** (http://www.dwaihi.com/poem/28fmusaed10.ram)

ياصغّيّر السن قدرك طاحـت أبراجـه .... الجرح خلّى الصخر ينطـق ونطقّنـي

خلاص ماعاد تعنـي لـي ولا حاجـة .... رح.. جعـل ربـي يوفقـك ويوفقنـي

من بعد ماكنت نور العمـر وسراجـه .... اليوم صرت الظـلام اللـي يطوقنـي

عطيتك أكثر من اللـي كنـت تحتاجـه .... أسرفت ف ( الحب) ..لين الحب وهقني

خلاص.. مالي ومال الحب وإزعاجـه.... مالي ومال الـدروب اللـي تضايقنـي

تعبت أضـمّ البحـر وأهـدِّي أمواجـه.... تعبت أجامل و أشوف الوقت يسرقنـي

شكواي للي عليـه الضيـق و إفراجـه.... اللي إذا شـاء.. يرحمنـي ويرزقنـي

أما أنـت يابـو جبيـنٍ عقّّـد حجاجـه.... لاعاد تسأل: "علامك ما أنت طايقني ؟"

النـاس كـلٍ علـى دربـه ومنهاجـه.... وأنا عن النـاس مابـه شـي يفرقنـي

إلا أني دايم أحـب الصـدق وأواجـه.... مخلوق .. و الله على هالوضع خالقنـي

حتى رفيقي ضمـاد الجـرح وعلاجـه.... على كثر ما أتمّسك فيه .. صدقّنـي ..

لو أدري إنه مرافقنـي علـى حاجـه.... لأمسّكه حاجتـه.. وأقـول : فارقنـي

* * *

ملاك السلطان

12-18-2007, 12:07 PM

* * *

** ( أعز إنسان ) ** (http://www.dwaihi.com/poem/28fmusaed1.ram)

صوّت حبيبي وقبـل أقـول ياعونـك.... شكى جروحه ورحت أشكي له طعوني

يقول مقدر أعيش اليـوم مـن دونـك.... وأقول حتى ولو ماعشت مـن دونـي

يمكن أنا اكون أعز إنسان ف عيونـك.... بس انت والله كل النـاس ف عيونـي

لا صرت ربعي وداري فيّـة جفونـك.... وش دخّل الناس خل النـاس يجفونـي

يكفيني إن انت لا من قلـت وشلونـك.... تطيب كل الجـروح ويختلـف لونـي

وإن كان منتب مصدقني علـى هونـك.... تعال وطالـع دروبـي ويـن ودونـي

أصبحت أجامل عداي اللـي يحبونـك.... وأكره مشاهد عـداك اللـي يحبونـي

ومن كثر ما احب واكره عنك واصونك.... أصبحت دفتر مشاعر وأنت مضمونـي

إن غبت عني شعـرت بلـذة طعونـك.... وإن شفت زولك شعرت بقيمه عيونـي

* * *

ملاك السلطان

12-18-2007, 12:09 PM

* * *

** ( الدلوعـة ) ** (http://www.dwaihi.com/poem/28fmusaed3.ram)

إيه أعرفك بنت عز وكلمتك مسموعـ.... هوأدري إنك من خلقتي في ظلال وفيّـه

مالعب فيك الزمان ولاقرفتـي جوعـه.... ولاوقفتي من همومـك وقفـة محنيـه

أدري ورب اليتيم اللـي يهـل دموعـه.... مابعد هلت دموعك في ضحـى عيديـه

بين حضن أبوك وأمك وردةٍ مزروعـه.... طول عمرك مافقدتـي لمسـة الحنيـه

إيه أعرفك وأعرف إن الناس لك متبوعه.... وأدري إن أمرك مجاب وحاجتك مقضيه

بس أنا من فضل ربي هامتي مرفوعـه.... ورث أبوي وراس مالي عزوة جبريـه

ماأنحنيت إلا لمخافة ربـي المشروعـة.... ولابعد دفقـت دم الوجـه أمـد ايديـه

بدوي ماعرفت الضحكـة المصنوعـه.... احمد الله من خلقـت وطيبتـي فطريـه

قانع في حكمة الله ماشي فـي طوعـه.... ماحسبت حساب دنيـا ناسهـا طرقيـه

إيه أنا ياأم الترف قلبي غدا موضوعـه.... الفراق اللي بلا رجعه وطـاري جيـه

بس روحي سايري قلبك وهدي روعـه.... واعذريني .. وإلا عادي ازعلي عليـه

دامها وصلت لـذل النفـس يالدلوعـه.... والله ان يعيش راسـي ماانحنـى لبنيـه

* * *

ملاك السلطان

12-18-2007, 12:12 PM

* * *

** ( اللي تركنـي ) ** (http://www.dwaihi.com/poem/28fmusaed4.ram)

اللي تركني وأنا في عـز غربالـي.... بعد الشدايد وش اللي ذكـره فينـي

يبغى زمانه يعود ويرجـع الغالـي.... وش لون يرجع بعد ماطاح من عيني

لاالوقت وقته ولاله شي في بالـي.... أنا نسيتـه مثـل ماكـان ناسينـي

ياما تمنيت نظرة منـه فـي حالـي.... يامـا تمنيـت صوتـه لويناديـنـي

وأقول لااظلم علي الليـل بلحالـي.... الله يجيبـه يشتـت غربـة سنينـي

من كثر ماكان طيفـه دايـم قبالـي.... احيان احسه معي وتضمـه ايدينـي

ولامن تنبهت ليـن وجيـه عذالـي.... كلٍ على ماطـرى بالـه يسمينـي

ليته تركني بعد هـذا علـى فالـي.... زي ماتركتـه بعدقتلـه بساتيـنـي

من بعد ماصار جاب بلسانه الحالي.... يبغى يرجـع زمـان بينـه وبينـي

قولوا له اني مااحبه كثر ترحالـي.... او لا حرام يتضايـق والا يبكينـي

قولوا له اني احبه بس مـن تالـي.... ان راح والا رجع ماعـاد يعنينـي ..

* * *

ملاك السلطان

12-18-2007, 12:14 PM

* * *

** ( يبــه ) ** (http://www.dwaihi.com/poem/28fmusaed18.ram)

يبه وانا بعد (12)عـام حسيـت.... اني قـدرت اقـول شـيٍ كتمتـه

ابطى قصيدي ماانكتب فيك وابطيت.... اجر صوتي وارجع اجر صمتـه

ماودي اكتب بيت واندم على بيـت.... ماهوب شعر الشعر كاني زهمتـه

الشعر كانه ماانحنى ليّّ .. ماجيت.... ان ماعـزم مرثيتـك ماعزمـتـه

ان ماكتبته باازرق الدمع وابكيـت.... كل الجـروح المبطيـه مارحمتـه

يبه وانا من بعدك ابـو التناهيـت.... مامـر طعـمٍ للحـزن مانهمـتـه

يبه ( يبه ) كلمه وانا كل مااوحيت.... كلمة ( يبه ) صديت والوقت لمته

يبه ( يبه ) كلمه وانا كـم تمنيـت.... اهدم بها وابني بها اللـي هدمتـه

يبه وانا لاضقت رحت وتهجيـت.... ركون بيـتٍ ضـم حلـمٍ حلمتـه

يومك تعلمنـي الامـن تحاكيـت.... درس الحياه اللي كبرت وفهمتـه

هنـاك كانـت دلتـك لاتقهويـت.... وهناك كان يساق طيـبٍ حشمتـه

وهناك ايه اذكرني هنـاك خليـت.... طفلٍ مـلا بالدمـع دربٍ رسمتـه

هناك جاني علمـك انـك توفيـت.... وهناك خاويت الشقـا واحتزمتـه

واليوم قلت اليوم يومـي ومديـت.... كف القصيد وطاح شعر ونظمتـه

لكن بعد صمت اثنعش عام حسيت.... اني عجزت اقول شـيٍ كتمتـه ..

* * *

ملاك السلطان

12-18-2007, 12:28 PM

* * *

أمّا فيما يختصّ بهه القصيدة .. فإني أرها مجموعة قصائد إجتمعت مع مزيج إبداع فهد المساعد .. وأنتجت هذه الدرّة الفريدة ..

** ( كبوة جواد ) ** (http://www.dwaihi.com/poem/28fmusaed14.ram)

صعب لا منّك فشـلت ... وصعب لا منّك لقـيت
إن من يكره نجاحك ... يدري أنك ما نجحت

أمس ضقت ورحت أقلّب ذكرياتي .. وانتهيت
عندصورة طفل صوته مثل صوتي لاإنجرحت

وش مثل ؟ لا والله الا هذا أنا يـــوم ابــتديت
انطق حـروف تلعثم في لســاني لا انـمدحـت

هذا أنا يــوم الحيـــاه افنظرتي عشرين بيت
ومسجدين ومدرسه من طين كم فيهااصطبحت

هذا أنا ..وأصبحت اتمتم(هذا أنا)حتى بغيت
اختنق .. بس القدر عيّا على موتــي .. وطـحت

وصاح صوت الطفل فيني : انت من وين ارتميت
قلت انا المستقبل اللي فيه كم هــمـت وطـمحت

امـس كنـت ابيــك تــكبر .. بس والله لـو دريـــت
اني اللي عشت لجله .. مــت عنــدك واســترحت

لـــو دريـت ان الزمـــان يـــجر رجـــلي ما عديت
ولو دريت ان البـــحور بلا مــواني ما ســبحـــت

كــــان دربك لي طويـــل .. وكل ماشفتك هويت
قــــلت لك كـبــوة جـــــواد وماكبيت الا وجمحت

ليه تســمعني وتمــشي .. آه ليـــتك مامشــــيت
وآه ليـــــتك من كـــثر عثــــرات الأيـام انتصحت

ضــاعت أحــــلامي وضل الحـزن فيني واهتديت
للطـــريق اللي يــــوديني على دمـــعي ورحــت

يالحــــــــزن ليتك مثل دمــــعي وتنـــزل لارقيت
بس اعـــرفك لو مســحت الدمع تبقى ما انمسحت

كــــــان حـــلمي في وجود انسان يبكي لابكيت
وصار حـــلمي في وجــــود انسان يفرح لافرحت

كنت اشـــــــــوف الناس مثلي كل ماجعت وظميت
مادريت ان الأوادم نـــــاس فــوق ونـــــاس تـــحت

آه يـــــأول ذكــرياتي .. خذني افحضنك نســـيت
لاأسألك عن وجـــه ابوي اللي مــعــه ياما سرحت

خذني افحضـــنك ابغفى .. يا آه مبـــطي ما غفيت
وأن لــــمحت دمــــوع عيني .. سو نفسك ما لمحت

خذني افحضنك وبعـــثر في جروحي .. وأن قضيت
هز لــي كتفي وقلي : عيـــب تبــــكي لو سمـــحت

أضـــــــحك ... وعلّم زماني من أنا .. ومن وين جيت
طق بـــــــاب الحـــــزن وأصرخ فيّ لامنّي فتــــحت

وضمنــــي يمّك ... وكــــمّل ضحكتك لا من بكـــــيت
ودي اذكـــــر كيف كــــانت ضحكتي .. لا من فرحت

* * *

ملاك السلطان

12-18-2007, 01:07 PM

* * *

** ( التـوبـة ) ** (http://www.dwaihi.com/poem/28fmusaed2.ram)

تطيح دمعة واسلم للفضا موقي ؛؛ وارفع يدين الذنوب وتظلم أعماقي

أشوف قبري يمر بوحشته فوقي ؛؛ وتصير كل الحياة أضيق من أخلاقي

يا نفس طالت ليالي غينا فوقي ؛؛ كم قلت يالله وقلتي تونا باقي

المزنه اللي تحن لغيثها نوقي ؛؛ تعبت اخيلك واقول نياقي نياقي

تعبت ياما تعبت وضاعت حقوقي ؛؛ ياما ندمت وردمت الذنب فـ اوراقي

ياما سكت وتركت البوح لعروقي ؛؛ أخاف أسولف واخيب هقوة الهاقي

اخاف ابوح ويخون الصمت منطوقي ؛؛ واقول شي يحث الناس لفراقي

يالله وانت الملاذ ان مسني عوقي ؛؛ وانا ذنوبي جهد من راسي لساقي

يالله تغفر خطاي وترحم وتوقي ؛؛ عظمي نهار الحساب وتقبل اعتاقي

* * *

عبدالرحمن محمد

12-18-2007, 01:10 PM

ملاك السلطان

يعطيك العافيه

ارويتي عطشي بقصيد المبدع فهد المساعد

لاخلا ولا عدم

! غــزيــل !

12-18-2007, 01:11 PM

™ ملآكـ السلطآن™

متعة هي القراءة والاستمآع لشآعرنآ فهد ..

ذيلت مشاركتك بـ " تقديرك الجم " ..

و انا اقولها أن حضورك " ألجم " الألسن !

ذوقكـ مبهر

أختيآركـ رآئـع

كوٍنيٍ بـ خير

ملاك السلطان

12-18-2007, 01:12 PM

* * *

** ( صـالات المطـار ) ** (http://www.dwaihi.com/poem/28fmusaed13.ram)

قبل اسافر كنت جالـس فـي زمـان الأنتظـارارتشف هم المكـان .. و كـل همـي حاجتيـن

كنت خايف من يباس .. و كنت خايف من خضاركنت اخاف انك تجين و كنت خايف مـا تجيـن

لين شفتـك مـن ورا بيبـان صـالات المطـارمقبله من كثر شوقك .. كنت اشوفـك تركضيـن

مرةٍٍ ركضـك يميـن و نظـرة عيونـك يسـارو مرةٍٍ ركضك يسـار و نظـرة عيونـك يميـن

تايهة .. ما كنـك الا ضحكـةٍ وسـط انكسـارساكتـه .. ماكنـك الا دمعـةٍ فيـهـا حنـيـن

خايفة .. وجلة .. حزينة .. يعني كنتي بأختصارتشرحين لكل جاهل معنـى كلمـة ( عاشقيـن )

بعدهـا جيتـك ولـدّت عينـك و دار الـحـوارمن كفوفـي دمعتيـن و مـن كفوفـك دمعتيـن

كنت اصد و كنتي انتـي ثايـره مثـل الشـرارماعلى لتغة لسانك غير كلمة ( وين ؟ ويـن ؟ )

واذكر اني رحت قبل ابـدي لـك ايّـة اعتـذاررحت حتى قبل اطيّـب خاطـرك فـي كلمتيـن

لكن انتي عارفتني زيـن واللـي صـار صـارسامحينـي واذكرينـي قـدّ ماانتـي تقـدريـن

اذكريني لاانتهـت للشمـس رحلـه مـع نهـارواذكرينـي لاصحـى للصبـح ورد الياسمـيـن

واذكريني لا لمحتـي فـي ليالـي البـرد نـارواذكريني لا سمعتـي للمطـر صـوت ٍ حزيـن

اذكرينـي واذكرينـي واذكرينـي .. بأختصـار..اذكري فهد المساعـد قـدّ ماانتـي تقدريـن !

* * *

ملاك السلطان

12-18-2007, 01:17 PM

* * *

** ( لاتـسـافـر ) ** (http://www.dwaihi.com/poem/28fmusaed15.ram)

قلبي لـه اليـوم .. ثالـث يـوم موجعنـي .... وعيني لها اليوم ثالـث .. تجمـع طيوفـك

والبـال كنّـه علـى دربـك يوزعـنـي.... ولسانـي ماكنـه الا خـلـق لحـروفـك

لاالنـوم نافـع .. ولا التفكيـر نافعـنـي.... انام واصحى على الباقـي مـن وصوفـك

بالله قلي .. شعـوري هـذا وش يعنـي !؟ .... طمنّـي .. الله يطمـن همّـك وخـوفـك

بيني وبينك .. ترى اللي صدق ضيعنـي .... ان انت في اخر لقا .. شارح لي ظروفك

مدري وش اقول .. لكن تدري .. اسمعنـي.... خابرك وافـي .. و أبيـك تتـم معروفـك

ان كنـت نـاوي تسافـر .. لاتودّعـنـي.... بس انتبـه .. لا تسافـر قبـل مااشوفـك ...

* * *

ملاك السلطان

12-18-2007, 01:31 PM

* * *

** ( ثلاث سنيـن ) ** (http://www.dwaihi.com/poem/28fmusaed9.ram)

ياعين هلي دموع الوجد وانهمري .... محتاج لي دمعتين تعيد ترتيبي

نويت دمر الزمان اللي نوى دمري.... بايعك ياطيبتي شاريك ياطيبي

والدانه اللي تغنج كنها القمري.... أمنتكم بلغوها يا مناديبي

لاعاد تشفق على نخلي ولا تمري.... ولا عاد تشره علي في قل ترحيبي

إن كان ربي عطاها لونها الخمري.... الله بنفسي عوضني فقر جيبي

أمنتكم الله بلغوها تحتري جمري.... مادام مافاد معها حسن تهذيبي

إن عشت والله لأمشيها تحت أمري.... وأحس فيها تعذب كثر تعذيبي

هذريت فيها ( ثلاث سنين ) من عمري.... وان قالها الله لأخليها تهذريبي

* * *

ملاك السلطان

12-18-2007, 01:35 PM

* * *

** ( النـاس ) ** (http://www.dwaihi.com/poem/28fmusaed7.ram)

ياصاحبي لاتجي وتقول لي قالوا
لو قلت .. ماقلت غير الله يجازيهم

لاشفت بعض الاوادم للردى مالوا
نفضتهم من عيوني قبل اخليهم

يكفيني القدر نلته يوم ما نالوا
إلا .. أو أقول .. ما ابغى أجيب طاريهم

ما أقول غير انت لامن حطوا وشالوا
تعوذ برحمة الله من اساميهم

وذكرهم إن الأعمار إن طالت وطالوا
الخالد الذكر وإلا الموت قافيهم

أما انت ياقلب إن صالوا بك وجالوا
خلك مثل ما انت لاتشره على ايديهم

الناس من خلقة الدنيا ومازالوا
عيال رجال لكن فيهم وفيهم

ذولاك من عرض ناس مالي إن مالوا
إلا اني اسكت وأقول الله يجازيهم

* * *

ملاك السلطان

12-18-2007, 01:37 PM

* * *

** ( رسـالة ) ** (http://www.dwaihi.com/poem/28fmusaed11.ram)

ياصاحبي جيتـك اشكيلك مـن أحوالي
جـيـت ومادامك رفيقي لـيـه أطوّلها

العلـم وما فيه يا أول وآخــر أمالي
عندي رساله ولا ادري كيف أوصلها

للي سبتني وأنا من قبلها سالي
أبيك توقف معي .. وتروح وتسألها

وش فيهـا تفتح عـلي أبواب عـذالي
وتحـمّـل النـفـس حاجـه ما تحمـلها

وش فيهـا رغـم الوفا تتركني لحالي
وأنا لجفاها تركت الدنيا بأكمـلها

إن كان هـذا زعل .. علمها يالغالي
ما كان قصدي ورب البـيـت ازعلها

علمها والـلـي يخلي قـلـبك الـخالي
عن ضيقتي وين وصلت من تجااااهلها

علمهـا كـم لي وأنا ماشـلـت جـوالي
كله علـشـاااان مـا اقـلـب رسايـلها

وعلمها وشلون لامرت عـلى بالي
أروح وأضم صـورتها واقـبلها

وعلمها كيف انشغل عن كثرة أشغالي
واسرح واغـمض عيوني واتخيلها

علمها عـني وعـن هـمي وغـربالي
علمها عـن كل حاجه في تجهلها

وان شفتهـا دنقـت تبكي عـلى حالي
انسى الـكلام وتذكر كـلمه وقـلها

قل شاعـرك يعتذر ويعاهـدك تالي
انـه يـرتب حساباته مـن أولها

ويقـول حتى القصيـد اللي على بالي
والله مـاعاد اكـتبه كانه يـزعـلها

* * *

ملاك السلطان

12-18-2007, 01:40 PM

* * *

** ( اللّي تركنـي ) ** (http://www.dwaihi.com/poem/28fmusaed4.ram)

اللي تركني وأنا في عز غربالي ... بعد الشدايد وش اللي ذكره فيني

يبغى زماني يعود ويرجع الغالي ... وشلون يرجع بعد ماطاح من عيني

لا الوقت وقته ولا له شي في بالي ... أنا نسيته مثل ماكان ناسيني

أنا تمنيت نظره منه في حالي ... ياما تمنيت صوته لو يناديني

وأقول لأظلم علي الليل بلحالي ... الله يجيبه يشتت غربة سنيني

من كثر ماكان طيفه دايم اقبالي ... أحيان أحسه معي وتضمه ايديني

ولامن تنبهت لين وجيه عذالي ... كلٍ على ماطرا باله يسميني

ليته تركني بعد هذا على فالي ... زي ماتركته بعد قتله بساتيني

من بعد ماصار جاء بلسانه الحالي ... يبغى يرجّع زمانٍ بينه وبيني

قولوا له إني ما أحبه كثر ترحالي ... أو لا .. حرام يتضايق وإلا يبكيني؟؟

قولوا له إني أحبه .. بس من تالي ... إن راح وإلا رجع ماعاد يعنيني

* * *

ملاك السلطان

12-18-2007, 01:45 PM

http://www.alqnas.com/vb/attachment.php?attachmentid=41931&d=1170094612

* * *

صاحب جميل .. وقلبك أجمل .. والأجمل ..
ضحْـكَـتك يابو ضـحـكةٍ / .. تـشـبه العيد .. /

ماأقول كامـل .. بس قـــرّبت تكمل
ماناقصك غــير ( أحـترام المواعـيد )

* * *

دوّرت بـعـدك حـبـيـب .. وقلت في بالي ..
أحب هـمـي ؟ .. وقال الـقـلب : روّ قنا

قلت أنت وش دخّـلك .. بأحب غربالي
أقلّ حاجه .. نمـوت وماتفارقنا

* * *

ماعرفت أرضيك ياعذب اللما
يوم تمدحني .. ويوم تسبّــني

أنت يأمّا حبني حـبٌ عـمى
والاّ ريحّـني .. بلاش تحبّـني !!

* * *

الـدمع ماهو عـيـب .. رح علـّـم اللي
يقـول عــمره مابكى في حـياته

الـدمع مايقـطـع صلاة المصـلي
والضحك مثل أبليس .. يقطع صلاته !!

* * *

تـدرين لامنـّك زعـلـتي وش يـصير ؟!
تدرين لامن صار خـاطرك مـكـسور ..

تكـّدس أغصان الشجر بالعـصافير
وكل ماذرفتي دمعه .. يموت عصفور

* * *

يافديـت اللي اذا جـيـته أقول :
قل أحـبك .. أسـتحى ماقالها

وأن زعلت .. يتمتم بهمس ٍ خجول :
تـطـلع أحـسن لـو تجي من حالها

* * *

ملاك السلطان

12-18-2007, 01:51 PM

http://www.alqnas.com/vb/attachment.php?attachmentid=41903&d=1170092757

* * *

http://www.alqnas.com/vb/attachment.php?attachmentid=41905&d=1170092757

* * *

يا رفيف الماء .. وفجر العيـد .. وأحـزان الموانـي
يا أكثر أهل الأرض طيبـة قلـب .. وأسـرار دفينـه
المكـان اللـي هنـا .. مليـان ضحكـات ، وأغانـي
والكلام اللـي بغيـت أقـول .. يحتـاج ل سكينـه !
شوفي الركن البعيـد هنـاك .. كنـه صـدر حانـي
هـذا هـو اللـي يليـق ب شاعـر وبنـت حزينـه!
أنسـي الشـارع ، وعتمـات الـزوايـا، والمبـانـي
هاتـي يدينـك نلـف الغـيـم ونشـكـل مديـنـه !!
عنـدي الليلـة كـلام وصمـت .. وأخـاف الثوانـي
تظلمه .. أو تظلـم اللـي فيـه كـم ضاعـت سنينـه
بـس لازم تسمعـيـن الـلـي أبــي ولا تـرانـي
لو ب أعيده لك .. نسيت .. ورحت أقول اللـي تبينـه
شي واحد قبل ما أبـدأ .. مـا أبـي أي شـي ثانـي
يخطر ف بالك .. وأنا أكشف لك شعـور تجهلينـه !
إن أنا .. وبكـل مـا تحملـه "أحبـك" مـن معانـي
كنت،وراح أبقى أحبك .. لين .. مدري وش هو لينه !!
بـس والله ماقـدرت أنسـى .. ولا همـي نسـانـي
لا ذكـرت إنسـان .. فيـه أسـرار مابينـك وبينـه
كـل مـا تطـري علـي فكـرة هـواك الأولانــي
أشعـر إنـي أنطعـن مليـون مـره مــن يديـنـه!
أشعـر إن عيونـك.. الله مـا خلقـهـا إلا عشـانـي
كيف كانت تبتسـم لـه؟!.. قولـي إنـك تخدعينـه !!
صورة إنـه كـان يمسـح دمعـك .. تزلـزل كيانـي
وكيـف كـان يلـم شعـرك .. ويتبعثـر فـي يمينـه
حتى اسمـك يـوم رحـت أدلله .. حظـي رمانـي..
بنفس الاسم اللي يقـول .. بذمتـك ماهـي غبينـه !؟
وكنـي اللـي .. كـل مـا أناديـك بالاسـم الفلانـي
أطلـب النسيـان .. يتـرك منـه شـي تذكرينـه !!
لا تظنينـي أنانـي .. لا .. أنــا مانـيـب أنـانـي
لو سلمت من الغرق . ب أموت في ظهـر السفينـه!
يا إني ما أكمل وأعانـي .. أو أكمـل ثـم أعانـي..
كل ما اسمع طاري اسمه .. أو تجي عيني في عينـه!
أينا كـان الضحيـه ؟.. وأينـا اللـي كـان جانـي ؟
مـدري !.. ولكـن قـراري لازم إنــك تقبليـنـه:
مثـل مـا أكـره فكـرة إنـه واحـدٍ ياخـذ مكانـي
ما أقدر أجلس في مكـان إنسـان.. كنتـي تعشقينـه

* * *

ملاك السلطان

12-18-2007, 01:59 PM

http://www.alqnas.com/vb/attachment.php?attachmentid=41953&d=1170095986

ثمّ إنّي تعبت !!

تمّ الإستعانة في الإستبانة بـِ :

ـ موقع الضويحي الأدبي .

_ موقع القنّاص " لم أعثر عليه إلا ّ في الوقت الضائع " . :)

ـ كمبيوتر ملاك السلطان .. :p

هذا وإنّ الله ولي التوفيق ..

بحر غرور !http://www.grooor.com/vb/images/smilies/smile17.gif
http://www.grooor.com/up/uploads/74bab606e1.gif

http://www.5foq.net/uploads/03f211591e.gif

ملاك السلطان

12-18-2007, 02:04 PM

بالمناسبة ..

يسمونّه .. شـ اعر .. المدينـة والغريـ ب ..

http://www.alqnas.com/vb/attachment.php?attachmentid=41946&d=1170095595

قاتل الله النسيان :p

عبدالرحمن محمد

12-20-2007, 09:27 AM

الله عليك

ما قصرتي ملاك السلطان ابدعتي في كل شي

من تنسيق من جمع معظم قصائده من

لاخلا ولا عدم

أسايرك تعاندني

12-21-2007, 09:49 PM

ياصاحبي لاتجي وتقول لي قالوا
لو قلت .. ماقلت غير الله يجازيهم

لاشفت بعض الاوادم للردى مالوا
نفضتهم من عيوني قبل اخليهم

يكفيني القدر نلته يوم ما نالوا
إلا .. أو أقول .. ما ابغى أجيب طاريهم

ما أقول غير انت لامن حطوا وشالوا
تعوذ برحمة الله من اساميهم

وذكرهم إن الأعمار إن طالت وطالوا
الخالد الذكر وإلا الموت قافيهم

أما انت ياقلب إن صالوا بك وجالوا
خلك مثل ما انت لاتشره على ايديهم

الناس من خلقة الدنيا ومازالوا
عيال رجال لكن فيهم وفيهم

ذولاك من عرض ناس مالي إن مالوا
إلا اني اسكت وأقول الله يجازيهم

صح الله لسااانه ملاااااين
والشاعر ماعليه كلامه ..معروف بقصايده اللي الاغلبيه حافظها

تسلمين يالغلا على الديوان المقروء :)

وكل قصيده احلا من الثانيه

لا تحرمينا من ابداعج

موضوع مثبت